طالبانو په درېیو نورو ولایتونو کې د ساه لرونکو پر عکس اخيستو بنديز ولګاوه
پر رسنيزو فعاليتونو د بنديزونو د دوام په لړ کې داځل طالبانو په بدخشان، بغلان او نیمروز ولایتونو کې د ساه لرونکو پر عکس اخيستو بنديز ولګاوه.
د افغانستان د خبریالانو مرکز وایي، د طالبانو د امر بالمعروف او نهې عن المنکر ادارې په یادو ولایتونو کې رسنیو ته امر کړی چې له دې وروسته ساه لرونکي انځورونه خپاره نه کړي.
خبرپاڼې زیاته کړې چې په بدخشان، بغلان او نیمروز ولایتونو کې د دې بندیز له اعلان سره د هغو ولایتونو شمېر چې په کې د ساه لرونکي انځورونو خپرول په رسمي ډول منع شوي، لسو ولایتونو ته ورسېد.
د افغانستان د خبریالانو مرکز ویلي چې د امر بالمعروف او نهې عن المنکر ادارې مسؤولینو د سیمهییزو رسنیو مسؤولین احضار کړي او دغه بندیز یې په حضوري ډول هم هغوی ته اعلان کړی او د نه پلي کولو د پایلو په اړه یې خبرداری ورکړی دی.
له دې وړاندې د طالبانو د امربالمعروف وزارت په کندهار، تخار، بادغیس، هلمند، ننګرهار، نورستان او فراه ولایتونو کې په رسمي ډول د ساه لرونکو پر عکس اخيستو بندیز لګولی و.
دا په داسې حال کې ده چې طالبانو د خپلې درې کلنې واکمنۍ پرمهال پر رسنیو محدودیتونه زیاته کړي او له همدې امله زیاتره رسنیو خپل فعالیت درولی دی.
