طالبانو په پکتیکا کې یو قومي مشر نیولی
په پکتیکا کې محلي سرچینې خبر ورکوي چې طالبانو د دغه ولایت په مرکز«ښرنه»کې یو قومي مشر نیولی دی.
سرچینې ویلي چې یاد قومي مشر کشمیر خان نومیده او د طالبانو استخباراتو(دوشنبه،د لړم۲۸مه)د پکتیکا مرکز ښرنې اړوند«محمد خېلو»سیمه کې له خپل کور بیولی او اوسمهال د طالبانو د استخباراتو په ریاست کې بندي دی.
سرچینه زیاتوي نوموړی څه موده وړاندې هم د طالبانو استخباراتو له مقاومت جبهې سره د اړېکو په تور نیولی و، خو وروسته بیا د قومي مشرانو په ضمانت خوشې شو.
یوه بله سرچینه وایې تراوسه د نیول شوي قومي مشر د نیول کیدو لامل مالوم نه دی خو دا ځل هم قومي مشران هڅه کوي دغه قومي مشر د طالبانو له زندان یې خوشې کړي.
د سرچینې په وینا نیول شوی قومي مشر له هیڅ ډلې سره اړیکه نه لري او له کلونو راهیسې یې د یو قومي مخور په توګه د خلکو د ستونزو پر هواري بوخت دی.
طالبانو په دې وروستیو کې د هیواد په بېلابېلو ولایتونو د قومي مشرانو، پخواني نظامیانو او نورو عامو خلکو په یوه او بله بهانه د نیولو لړۍ چټکه کړې ده.
له دې څو ورځې وړاندې د طالبانو استخباراتو د لغمان په دولت شاه ولسوالۍ کې هم د تیر حکومت د محلی پولیسو یو قومندان له مقاومت جبهې سره د اړېکو په تور نیولی چې لا تراوسه په زندان کې دی
