د تورخم دروازه د څلورمې ورځې لپاره لاهم تړلې ده
د څلورو ورځو په تېرېدو د تورخم دروازه لاهم د پاکستان له لوري د هر ډول تګ-راتګ پر مخ تړلې ده او د دروازې دواړو خواوو ته سلګونه مسافر، بېړني ناروغان او له سودګریزو توکو بار موټر بند پاتې دي.
د کابل اوسیدونکی حمدالله چې غواړي د تورخم له لارې خپله مېرمن د درملنې په موخه پاکستان ته ولیږدوي وایې، په ډېرو ستونزو یې ویزې ترلاسه کړي خو اوس پرې د تورخم لاره له تېرو څلورو ورځو راهیسې تړل شوې ده.
هغه او ناروغه مېرمن یې هر شېبه د تورخم دروازې د بیا پرانېستلو انتظار کوي او له همدې کبله اړ شوي چې د لارې تر خلاصېدو، همدلته شپې وکړي.
حمدالله وویل:«نن مې څلورمه ورځ ده له خپلې ناروغه مېرمنې سره غواړم پاکستان ته لاړ شم، دلته ستونزې زیاتې دي په هوټلونو کې ځای نشته او هر شېبه د دروازې خلاصیدو ته انتظار باسو»
پر تورخم لاره پاکستان ته تلوونکي سوداګر او مسافر له طالب او پاکستاني لوري غوښتنه کوي چې ټرانزیټ دې له سیاست جلا کړي او هرڅه ژر دې د تورخم دروازه پرانیزي.
د حاجي زین الله په نامه یو سوداګر وایې د تورخم دواړو خواوو ته زرګونه له سوداګریزو توکو بار لارۍ له تېرو څلورو ورځو راهېسې ولاړې دي او د لارې خلاصیدو هیڅ امکان نه لیدل کیږي.
هغه وویل:«د تورخم لارې بندېدو عام خلک او خاص ډول سوداګر زیات له مالي توان سره مخ کړي غوښتنه کوو، دا لاره دې ژر خلاصه شي»
په تورخم یو شمېر سرچینو ویلي چې لا هم زرګونه موټر چلوونکي او مسافران چې د تورخم دروازې دواړو غاړو ته بند پاتې دي او غوښتنه کوي چې یاده لار دې پرته له کوم قید او شرط پرانستل شي.
بلخوا د تورخم لپاره د طالبانو کمیسار ملا عبدالجبار حکمت وایي، هڅه کوي چې پاکستاني لوري سره دا ستونزه د خبرو له لارې حل کړي او تورخم دروازه بیرته په عادي ډول د ترانزیټ او مسافرو پرمخ پرانیزي.
د هغه په خبره له پآکستاني لوري سره یې ناسته شوې خو له کومې پایلې پرته پای ته رسېدلې ده.
د یادونې وړ ده چې پاکستان څلور ورځې وړاندې د تورخم دروازه هغه مهال د هر ډول تګـراتګ پرمخ وتړله چې طالب لوري د ډیورنډ فرضي کرښې دې غاړې ته د تاسیساتو پر جوړولو بوخت وو.
د تورخم لاره تر دې وړاندې هم د طالبانو او پاکستاني لوري ترمنځ د ترینګلتیاوو له امله څو ځله تړل شوې ده، خو د دواړو لورو ترمنځ له خبرو او کله هم، هوکړو وروسته بېرته پرانېستل شوې ده.
