په کابل کې د خیاطۍ یوه کارخونه چې ټولې کاریګرې د ښوونځي زده کوونکې دي
د جامو ګنډلو په دې کوچني کار ځای کې ګڼ شمیر نجونې او ښځې د یوې نوې حرفې د زده کړو په موخه راټولې شوي دي.
د دې کارخونې مسووله زمینه وایې، تر ډیره یې کارکوونکې هغه ښځې او نجونې دي چې له زده کړو محرومې او دغه راز له اقتصادي ستونزو سره مخ دي.
د هغې په خبره دلته تر ډیره افغاني دودیزې لباسونه له جوړیدو وروسته بازار ته د خرڅلاوو په موخه وړاندې کیږي خو هغسې چې لازمه ده بازار نه لري.
زرمینه زیاتوي:«پر نجونو د ښوونځيو له بندیز وروسته په دې مرکز کې زیاتره نجونې د جامو په ګنډلو بوختې دي او دوی اوس تر ډیره خیاطي زده کړې او خپلې کورنۍ اقتصادي ستونزې حل کولای شي.»
د جامو ګنډلو له دغه مرکز هر شپږ میاشتې وروسته لسګونه نجونې د خیاطۍ له زده کړو وروسته فارغیږي، چې پر ځانګړي وسایل هم ویشل کیږي.
هغه نجونې چې اوسمهال په دغه مرکز کې پر کار بوختې دي دغو نجونو او ښځو ته د خیاطۍ ، مرۍ پېیلو، ګنډي افغاني لباس جوړولو په برخو کې روزل کېږي.
شکریه د دې کارخونې یوه له هغه نجونو څخه ده چې له تیرو څلور میاشتو راهیسې دلته پر خیاطۍ بوخته ده.
نوموړې وایې د ځان بسیاینې په موخه یې مسلکي زده کړو ته مخه کړې او خپلو هیلو ته د رسېدو لپاره مبارزه کوي.
شکریه زیاتوي:«ډیره خوشاله یم چې دلته خیاطي زده کوم اوس مې د جامو ګنډل یاد کړي او په دې سره به وکولای شم، چې د خپلې کورنۍ شته اقتصادي ستونزې تر یوې کچې حل کړم له طالبانو غوښتنه کوم چې د نجونو پرمخ ښوونځي او پوهنتونونه پرانیزي.»
د دې کارخونې نورې زده کوونکې ښځې په دې هڅه کې دي چې د کسب په زده کولو سره د خپلو کورنیو ورځنۍ اړتیاوې پوره او خپل راتلونکی له احتیاجه وژغوري.
له دې ډلې نورینه بله زده کوونکې ده هغې وویل:«له طالبانو غوښتنه کوو چې د نجونو پرمخ ښوونځي، پوهنتونونه او د روغتیایي زده کړو مرکزونه خلاص کړي، ځکه د نجونو له زده کړو پرته دا هیواد پرمختګ نشي کولای.»
په دې وروستیو کې د حرفوي زده کړو په برخه کې د نجونو لېوالتیا زیاته شوې او دوی هڅه کوي له فرصته په ګټې اخیستو یو مسلک زده کړي ترڅو له خپلو کورنیو سره تر یوه بریده مرسته وکړای شي.
