د«بیان ازادۍ کور» د ارزو ټلویزیون تړل کیدل غندلي
د بیان ازادۍ کور د طالبانو له لوري د«ارزو»په نامه د یو خصوصي تلویزیون تړل غندلي او له طالبانو یې په ټينګار سره غوښتنه کړې د بیان ازادي دې نه محدودوي.
د یادې ادارې څخه په خپره شوې خبرپاڼه کې راغلي چې، د طالبانو استخباراتو په کابل کې د ارزو ټلوېزیون پر دفتر چاپه وهلې او د دغه ټلويزیون شاوخوا ۲۰ کارکوونکي یې بندیان کړي دي.
خبرپاڼې زیاته کړې چې طالبانو دغه راز د یاد تلویزیون د ځینو نورو تخنیکي وسایلو پلټنې هم پیل کړي دي.
دغه بنسټ زیاته کړې چې طالبانو د ارزو ټلويزیون شپږ کارکوونکي له هیواد بهر رسنیو سره د همکارۍ په تور له ځان سره بیولي دي.
په همدې حال کې د افغان خبریالانو مرکز هم د یوې اعلامېې په خپرولو سره د ارزو تلویزیون تړل کیدل او د زیات شمیر کارکوونکو نیول کیدل تائید کړي دي.
واک ته د طالبانو په رسېدو سره په افغانستان کې پر خبریالانو او رسنیو محدودیتونه زیات شوي چې له کبله یې زیاترو خپلې دندې پرېښي دي.
