ایرلینډ له افغانستان سره د مالي ستونزو له امله د کرکټ لوبلړۍ ځنډولې
د ایرلینډ کرکټ بورډ خبر ورکړی چې د افغانستان پر وړاندې لوبلړۍ یې د مالي ستونزو له امله ځنډولې ده.
د ایرلینډ د کرکت بورډ ریئس "وارین دیوتروم" ویلي، چې دغه پرېکړه یې د هغوئ د لنډ مهالې بودیجې د محدودیتونو له امله کړې ده.
د هغه په وینا د افغانستان پر وړاندې ټاکل شوې لوبلړۍ کې یوه ټیسټ لوبه، درې ۵۰ اوریزې او درې ۲۰ اوریزې لوبې شاملې وې چې د بودیجې د محدودیتونو له کبله وځنډول شوې.
نوموړي زیاته کړې چې ایرلینډ لوبډله دا کال ډېر بوخت مهال ویش لري چې له امله یې له افغانستان سره لوبې نشي ترسره کولی او دغه پرېکړه یې سیاسي نه؛ بلکې مالي امکاناتو کمښت دی.
د افغانستان کرکټ بورډ تر اوسه د ایرلینډ د یادې پرېکړه په اړه غبرګون نه دی ښودلی.
افغانستان او ایرلینډ، چې دواړه د کرکټ د نړیوالې شورا (ICC) بشپړ غړيتوب لري؛ په ټیسټ لوبو کې دوه ځله سره مخ شوي دي، چې لومړۍ لوبه افغانستان وګټله او دوهیمه هغه د ایرلینډ پر بریا پای ته ورسېده.
په پنځوس اوریزو سیالیو کې دې دوه لوبډلو ۳۲ ځله د یو بل پر وړاندې سیالي کړې، چې افغانستان ۱۸ او ۱۳ ایرلینډ ګټلې دي.
