طالبانو په درې بهرني اتباع نیولي دي
د طالبانو د کورنیو چارو وزارت تائید کړې چې په افغانستان کې یې د یوې بریتانیايي جوړې په ګډون درې بهرني اتباع نیولي دي.
د یاد وزارت لپاره طالب ویاند عبدالمتین قانع رسنیو ته ویلي، چې یوه بریتانیايي جوړه او یو چینايي الاصله امریکايي او ژباړونکی یې نیول شوي دي.
هغه زیاته کړې چې دا کسان د افغاني پېژندپاڼۍ د لرلو او ځینو نورو «لاملونو» له کبله نیول شوي دي.
نوموړي د چینايي الاصله امریکايي وګړي د نیولو په اړه نور جزییات ورکړي نه دي.
له دې وړاندې راپورونه خپاره شوي وو، چې طالبانو په بامیان ولایت کې یوه بریتانیايي جوړه چې په بامیانو کې یې د زدهکړو او ماشومانو او مېندو د ملاتړ څو پروژې پرمخ وړلې، نیولې ده.
د مالوماتو له مخې دا جوړه د فبرورۍ میاشتې پر لومړۍ هغه مهال نیول شوې چې په بامیانو کې د خپل کور پر خوا روانه وه.
د نیول شوې کورنۍ غړو ویلي چې پلار او مور یې له ۱۸ کالو راهیسې په افغانستان کې د زدهکړو په برخه کې فعالیت کاوه.
طالبانو له دې وړاندې هم په بامیان، ننګرهار، کابل او نورو ولایتونو کې یو شمېر بهرني وګړي په یوه او بله پلمنه نیولي وه.
