سبا د هیواد په ځینو سیمو کې د پولیو واکسین کمپاین پيلېږي
«له پولیو څخه د پاک افغانستان» په نامه بنسټ اعلان کړی چې سبا(دوشنبه،۳د مرغومي) د افغانستان په بېلابېلو سیمو کې د پوليو یا ګوزڼ ضد واکسين نوی پړاو پیلېږي.
یادې ادارې په دې اړه جزییات نه دي ورکړي چې دا کمپاین به په کومو ولایتونو کې پلي شي او د څو ورځو لپاره به دوام وکړي.
د پولیو کمپاین داسې مهال پيلیږي چې د روغتیا د نړیوال سازمان د تازه راپور له مخې، سږکال په افغانستان کې د پولیو ۲۳ مثبتې پېښې ثبت شوي، په داسې حال کې چې تېر کال شپږ مثبتې پېښې ثبت شوې وې، چې ټولې یې په ننګرهار کې وې.
افغانستان او پاکستان په نړۍ کې یوازیني دوه هغه هیوادونه دي چې د پولیو ناروغۍ په له منځه وړلو کې نه دي بریالي شوي.
