ګڼ شمېر افغان زده کوونکې نجونې له عمان د ایستلو له ګواښ سره مخ دي

لسګونه هغه افغان نجونې چې د امریکا د پراختیایي ادارې (USAID ) په مالي لګښت عمان ته د لوړو زده کړو لپاره تللې وې اوس له دغه هیواده د ایستلو له خطر سره مخ دي.
د یادو نجونو له ډلې یې ځینو رسنیو ته ویلي چې د امریکا پراختیایي ادارې ورسره څلور کلن تړون لغوه کړی او پر دوی یې مالي لګښتونه درولي دي.
دغه افغان نجونو ویلي چې د امریکا یادې پرېکړې اندېښمنې او ناهیلې کړي دي او دغه راز دوی ته ویل شوي د مالي لګښت د بندېدو له امله به د دوی بورسونه پایته ورسېږي او د ۲۰۲۵ کال د مارچ له دویمې به ټولګیو ته نه ځي.
دا لسګونه نجونې په بېلابېلو برخو کې په زدکړو بوختې وې چې اوس پر ټولې هغه لارې تړل شوي او دغه راز یې د امریکا د پراختیایي ادارې (USAID ) څخه یو ایمیل هم ترلاسه کړی، چې ورته ویل شوي چې هېڅ راز مرسته او همکاري نه شي ورسره کولی او په څرګند ډول ورته ویل شوي چې بېرته به افغانستان ته ولیږدول شي.
د مالوماتو له مخې دغه ۸۲ نجونې په ۲۰۲۴ م کال کې د ( Womens’ Scholarship Foundation) دمیرمنو د سکالرشپ د بنسټ له خوانه هلته لیږل شوې وې او له دوی سره د امریکا د پراختیایي ادارې له لوري څلور کلن تړون شوی و، چې د زدکړو تر پایه به یې ملاتړ کېږي.
ډبليو اس اي" یا د ښځو د تحصيلي بورسيو صندوق چې د امريکا د نړیوالې پراختيايي ادارې USAUD له خوا تموېلېده د متحده ايالاتو د هغو ٦٠٠٠ پروګرامونو له ډلې يو دى چې په ټوله نړۍ کې نجونو ته د لوړو زده کړو امکان برابروي.
طالبانو په افغانستان کې د واکمنېدو راهیسې نجونو له ښوونځيو او پوهنتونونو له زده کړو منعه کړي او پر دوی دا بندیزونه تر امر ثاني لګول شوي دي.