کندهار کې یو مدني فعال او سندرغاړی د طالبانو له درې میاشتني بند وروسته خوشې شو
په کندهار کې ځایي سرچینې وایې چې د دغه ولایت په سپین بولدک ولسوالۍ کې یو محلي سندرغاړی او مدني فعال بخت محمد رېګوال چې درې میاشتې وړاندې د طالبانو له لوري بندي شوی و، خوشې شو.
سرچینې زیاته کړې چې نوموړی د طالبانو استخباراتو لخوا پر خپله فېسبوک پاڼه د پښتون ژغورنې غورځنګ د مشر منظور پښتين او پخواني ولسمشر ډاکټر نجيب الله د عکسونو د خپرولو په جرم نيول شوی و.
د سرچینې په وینا تر اوسه دا نه ده څرګنده چې بخت محمد رېکوال په نورو کومو تورونو نیول شوی او په کومو شرایطو له زندانه خوشې شوی دی.
طالبانو هم تر اوسه په دې اړه څه نه دي ویلي.
طالبانو بیاځلې واک ته له رسېدو وروسته تل د یو شمېر سیاسي کارپوهانو، د مدني ټولنې فعالانو او د پوهنتون استادانو په نیولو لاس پورې کړی دی.
