په روژه کې د بیوزله کورنیو له کړاو ډک ژوند

په روژه کې د بیوزله کورنیو له کړاو ډک ژوند

په افغانستان کې زیاتره بیوزله او ناچاره کورنۍ له دومره اقتصادي ستونزو سره لاس او ګریوان دي چې آن د روژه ماتي لپاره په کافي اندازه خواړه هم لري.

د محمدالله شپږ کسېزه کورنۍ چې د کابل په پل چرخي سیمه کې اوسیږي یوه له همدغو بیوزلو کورنیو څخه ده، چې د روژه ماتي لپاره هیڅ نه لري او د خدای هیلې ته ناست دي.

هغه په یوه پښه معلول دی خو لا یې هم خپل همت له لاسه نه دی ورکړی او په ښار کې کراچۍ چلوي.

هغه وایې بیوزلي او لوږه هغه حقیقت دی چې د ده په ګډون زیاتره کورنۍ ترې ځوریږي او له امله یې نه شي کولای چې ان په روژه کې خواړه واخلي.

محمدالله وویل:«په کابل ښار کې کراچۍ چلوم دومره پیسې ګټم چې د ناروغې لور درمل پرې واخلم خو په کور کې مې ډیری وخت د روژه ماتي لپاره هیڅ هم نه او ان په اوبو او د ګاونډیانو په ډوډۍ روژه ماتوم له زیاتو اقتصادي ستونزو سره مخ یم.»

عمران د یوې بل ناچاره کورنۍ سرپرست دی چې له خپلو دوه اولادونو او مېرمنې سره د لغمان په مرکز کې د بیوزلۍ او نیستۍ سختې شپې سبا کوي.

هغه له خلکو سره په ورځنۍ مزدورۍ کار کوي خو په خبره یې په دې وروستیو کې بې روزګاري دومره زیاته شوې، چې په میاشت کې ان لس ورځې کار هم نشي پیدا کولای چې له کبله یې په دې روژه هر ماښام ناهیلی او تش جیب کور ته ستنیږي.

عمران زیاتوي:«دلته په یوه خېمه کې اوسیږم له خپلې کورنۍ سره خپل ځای او ځمکه نه لرم، یو کال کیږي له پاکستان راغلي یم اقتصادي ستونزې زیاتې دي او په دې روژه کې بیا ډیر له ستونزو سره مخ یم هیڅ مې هم د روژې لپاره نه دي اخیستي ځکه پیسې نشته او ډیره کله په لوږه ویده کیږو.»

هغه زیاتوي چې په روژه کې یې سم خواړه تیار نه شو کړای او په وچې ډوډۍ او چای یې روژه نیولې او د پاتې روژې لپاره هم څه نه لري.

نوموړی زیاتوي پر اولادونو زده کړې کول یې تر ټولو لوی هیله ده، خو پر وړاندې یې بیوزلي هغه خنډ دی چې له کبله یې اوسمهال اولادونو له زده کړو بې برخې دي.

په همدې حال کې تازه د ملګرو ملتونو د بشردوستانه مرستو د همغږۍ دفتر یا اوچا ویلي، چې د روژې میاشت داسې مهال را رسېدلې چې میلیونونه افغانان نه پوهېږي راتلونکې خواړه به یې له کوم ځایه ترلاسه شي.

اوچا د یوې خبرپاڼې په خپرولو سره ویلي، چې ۱۴.۸ میلیونه افغانان د خوړو له نه خوندیتوب سره مخامخ دي.

پر دې سربېره یاد دفتر ټینګار کړی چې ۳.۱ میلیونه وګړي بیا په بېړني پړاو کې دي.

اوچا زیاته کړې چې اړمنو ته د رسیدګۍ لپاره د اړتیا وړ یو میلیارد او نهه میلیونو ډالرو له ډلې یوازې یو میلیون ډالر ترلاسه شوي دي.

له هغه وروسته چې طالبانو پر هېواد ولکه ټینګه کړه، له افغانستان سره د نړیوالې ټولنې مرستې را کمې او هغه پیسې چې د افغانانو وې، په نړیوالو بانکونو کې کنګل شوې او همدا لامل دی چې ورځ تر بلې د خلکو اقتصادي وضعیت ناسم لوري ته ځي او د لوږې او بې‌وزلۍ له سخت ناورین سره په مخامخ کېدو دي.