یونسکو: په افغانستان کې ۱.۵ میلیونه نجونې له زده کړو محرومې دي
د مارچ ۸مه؛ د ښځو نړیوالې ورځې په مناست د ملګرو متلونو علمي او کلتوري سازمان (یونسکو) ویلي، چې په افغانستان کې د طالبانو له لوري ۱.۵ میلیونه نجونې له زده کړو بې برخې شوې دي.
یونسکو د یو راپور په خپرولو سره زیاته کړې که د طالبانو له لوري په دغه هیواد کې د نجونو پر زده کړو بندیز تر ۲۰۳۰ زېږدیز کال دوام وکړي، دا شمېر به له ۴ میلیونو زیات شي.
په همدې حال کې د بخښنې نړیوال سازمان او د بشر حقونو د څار بنسټ هم په هېواد کې د ښځو پر وړاندې د طالبانو د محدودیتونو په اړه اندېښنه ښودلې ده.
په ورته وخت د طالبانو ویاند ذبیح الله مجاهد د ښځو نړیوالې ورځې په مناسبت په خپره کړې اعلامیه کې ویلي، چې په افغانستان کې یې د ښځو ټول حقونه شریعت او افغاني کلتور سره سم، تأمین کړي دي.
بل لور ته دد طالبانو امر بالمعروف او نهې عن المنکر وزارت وايي، د افغان ښځو په اړه د نړیوالو ادعاوې تر هوايي خبرو محدودې دي.
د دغه وزارت څخه په خپره شوې خبرپاڼه کې راغلي، چې ځینې هېوادونه او نړیوال سازمانونه د افغان ښځو له نوم ګټه اخلي او سیاسي استعفاده ترې کوي.
طالبان داسې مهال د افغان ښځو ټولو شریعي حقونو د ورکړې ادعا کړې، چې دې ډلې پر افغانستان له حاکمیت سره سم له شپږم ټولګي پورته د نجونو ښوونځي، پوهنتونونه او په وروستي اقدام کې د ښځو پرمخ طبي زده کړې هم بندې کړي.
له دې وړاندې د ملګرو ملتونو اندېښنه ښودلې وه، که پر افغان نجونو د طبي زده کړو بندیزونه دوام وکړي، افغانستان کې به د مور او ماشوم د مړینې کچه زیاته شي.
