ملګري ملتونه: طالبانو ته د نړۍ صبر په ختمېدو دی
افغانستان کې د ملګرو ملتونو د سرمنشي ځانګړې استازې روزا اوتونبایوا ویلي، چې طالبانو ته د دوی د سیاستونو له امله د نړۍ صبر پای ته رسېدونکی دی.
نوموړې دا څرګندونې د دغه سازمان امنیت شورا کې کړي دي او زیاته کړې یې ده، چې طالبانو له افغانانو او نړۍ سره په کړو ژمنو عمل نه دی کړی او په نړیوال نظام او ټولنه کې د یو ځای کېدو لپاره جدي نه دي.
نوموړې زیاته کړې چې طالبانو افغان نجونې او ښخې له زده کړو او کار منع کړي او دوی یې له حپلو حقونو بې برخې کړي دي.
د هغې په خبره د طالبانو له حکومت څخه د عامو خلکو ناراضیتي ورځ تربلې مخ په زیاتېدو ده او له همدې کبله د حکومت او ولس ترمنځ بې باوري او واټ زیات شوی دی.
د یوناما مشرې ویلي اوسمهال په نړیواله ټولنه کې د طالبانو ناسمو پالیسیو له امله افغانستان د لا منزوي کېدو له خطر سره مخ دی، ځکه د څو کلونو په تېرېدو لاهم د طالبانو حکومت هیڅ هیواد په رسمیت نه دی پيژندلی.
روزا اوتونبایوا د نجونو پر زده کړو بندیز، له ټولنې د افغان ښځو ایستل او سخت دریځه تګلارې د طالبانو شخصي او ایډیالوژیکې پالیسۍ بللي دي.
د ملګرو ملتونو په امنیت شورا ناسته کې د یوناما مشرې په افغانستان کې د یادې استازولۍ د ماموریت پر غځېدا هم ټینګار کړی.
که څه طالبانو تراوسه د یوناما د مشرې د تازه څرګندونو په اړه څه نه دي ویلي، خو له دې وړاندې یې په افغانستان کې د یوناما راپورونه بې اساسه او له پروپاګند ډک بللي او زیاته کړې یې وه، چې یوناما د طالبانو ناسم تصویر نړۍ ته وړاندې کوي.
