ملګري ملتونه: د مارچ په لسمه د افغان ښځو د وضعیت د ارزولو په اړه غونډه کوي
ملګرو ملتونو اعلان کړې چې د روانې مارچ میاشتې په لسمه نېټه به د امنیت شورا غونډه ترسره شي چې اصلي موضوع به یې د افغان ښځو د وضعیت ارزونه او په دغه هیواد کې د یوناما د ماموریت په اړه بحث او خبرې وي.
ویل کیږي چې د امنیت شورا د اوسنۍ غونډې مشري به ډنمارک کوي چې په کې به د یوناما ماموریت د غځېدو او برخلیک معلومولو په اړه خبرې او بحثونه هم وشي او دغه راز د افغانستان د وضعیت د درې میاشتني راپور وړاندې کول وي.
په ملګرو ملتونو کې د ډنمارک دايمي استازې کریسټینا مارکوس لاسن چې د امنيت شورا د غونډې مشري په غاړه لري ویلي، چې په دې غونډه کې د افغان ښځو د وضعیت د ارزولو سربېره د مدني ټولنې یو استازی به هم ګډون وکړي او دغه راز له غونډې وړاندې به د «ښځو، سولې او امنیت» تر عنوان لاندې یوه اعلامیه هم خپره کړي.
هغې په افغانستان کې د ښځو او انجونو پر اوسني وضعیت اندېښنه ښودلې او دا حالت یې ناهیلی کوونکی بللی دی.
د یوناما د ماموریت پای ته رسېدو سره سم تېره ورځ د طالبانو ویاند ذبیح الله مجاهد ویلي، چې په افغانستان کې د دغې استازولۍ ماموریت اغېزناک او بریالی نه و.
نوموړي زیاته کړې چې یوناما د طالبانو ناسم انځور نړۍ ته وړاندې کوي او لاسته راوړنې یې نه شریکوي.
د یوناما ماموریت داسې مهال پای ته رسېږي، چې دغې استازولۍ په افغانستان کې د طالبانو له لوري افغان ښځو سره د سختو پالیسیو او تګلارو راپورونه ورکړل.
یوناما له دې وړاندې په افغانستان کې هم د طالبانو لهخوا د بشري حقونو د نقض راپورونه ورکړي او ټینګار یې کړی، چې طالبان په افغانستان کې د ښځو او نجونو حقونه تر پښو لاندې کړي دي.
د طالبانو په تېره درې کلنه واکمنۍ کې د نجونو پرمخ د ښوونځیو او پوهنتونونو د بیا پرانیستلو بې برخلیک وضعیت هغه مسله ده چې په هیواد دننه او بهر یې توند غبرګونونه راپارولي دي.
