د بخښنې نړیوال سازمان د افغان کډوالو په ملاتړ کمپاین پیل کړی دی

د بخښنې نړیوال سازمان د افغان کډوالو په ملاتړ کمپاین پیل کړی دی
Photo: Amnesty International

له پآکستان څخه د افغان کډوالو د شړلو په غبرګون کې د بخښنې نړیوال سازمان (Amnesty International)  د افغان کډوالو په ملاتړ کمپاین پیل کړی دی.

یاد سازمان د دې کمپاین پر مهال له پاکستان غوښتي، چې د افغان کډوالو د جبري ایستلو لړۍ ژر تر ژره ودروي، په ځانګړي ډول هغه کسان چې د طالبانو له وېرې دې هېواد ته کډوال شوي دي.

د بخښنې نړیوال سازمان دغه راز ټینګار کړی چې په پاکستان کې د مېشت افغان کډوالو غږ به نړۍ ته ورسوي چې اوس مهال له غیرقانوني ایستلو سره مخ دي. 

بلخوا د ملګرو ملتونو د ځانګړي راپور ورکوونکي ریچارډ بینټ په ګډون د یاد سازمان ګڼ شمېر کارپوهانو هم له پاکستان څخه د افغان کډوالو په جبري ډول د ایستلو د لړۍ درېدو غوښنه کړې او اندېښنه څرګنده کړې چې په زور د افغان کډوالو ایستل کولای شي د ژوند خطرونو سربېره جنسیتي او د ښځو او نجونو حقوق زیانمن کړي.

د ملګرو ملتونو د کارپوهانو د هغو افغانانو برخلیک ته هم اندېښنه ښودلې ده چې نړیوال خوندیتوب ته اړتیا لري. دوی وايي که دا افغانان هېواد ته ستانه کړل شي، د ژوند لپاره یې خطرونه زیاتېږي.

ملګري ملتونه وايي، د پاکستان دا اقدام د کډوالۍ نړیوالو قوانینو او د یاد سازمان له دریځونو سره خلاف دی او غوښتنه کوي، چې پاکستان دې د افغان کډوالو اوږدمهالی کوربه توب وساتي.

له دې سره سم د راپورونو له مخې پاکستاني پولیسو په خیبرپښتونخوا، پنجاب او کراچۍ کې د افغان تابعیت کارت لرونکو کډوالو د نیولو او جبري اخراج لړۍ چټکه کړې ده.

بلخوا د خیبر پښتونخوا اعلی وزیر علي امین ګنډاپور وايي چې هېچا ته اجازه نه ورکوي څو افغان کډوال په زوره له دغه ځایه وباسي.

نوموړي یوې خبري غونډه کې د پاکستان حکومت ته وړاندیز کړی چې دغه هېواد دې افغان کډوالو ته د دایمي استوګنې زمینه برابره کړي.

پاکستان د تېرې مارچ میاشتې ۳۱ مه په داوطلبانه توګه ACC کارت لرونکو افغانانو ته وخت ورکړی و، چې له پاکستان ووځي، چې د یاد مهلت له پوره کېدو سره سم یاد هېواد د افغان کډوالو د نیولو او اخراج پراخ عملیات پیل کړي دي.