افغانستان تر سوډان وروسته له شدید بشري بهران سره مخ دی
د ملګروملتونو سازمان وياند سټيفن دوجاريک په افغانستان کې د بیوزلۍ د زیاتوالي په اړه اندېښنه ښودلې او په خپله اېکس پاڼه یې لیکلي، چې افغانستان تر سوډان وروسته له شديد بشري بحران سره مخ دی.
نوموړي زیاته کړې چې دا مهال د افغانستان ۲۳ ميليونه کسان بېړنیو بشري مرستو ته اړتيا لري.
د ملګرو ملتونو سازمان د ویاند د مالوماتو له مخې اوسمهال سوډان په ټوله نړۍ کې لومړنی هغه هېواد دی، چې شديد بحران ځپلی او ۳۰ ميليونه کسان يې عاجلو بشري مرستو ته سترګې پر لار دي.
په همدې حال کې تازه د ملګروملتونو د بشري چارو د همغږۍ دفتر (اوچا) هم خبرداری ورکړی، چې د روژې میاشتې په رارسېدو سره په افغانستان کې په میلیونونه خلک د خوړو له کمښت سره مخ دي او ډېر یې نه پوهېږي د کورنۍ اړتیاوې به له کومې لارې برابروي.
د ملګرو ملتونو د بشري مرستو د همغږۍ دفتر یا اوچا او دغه راز د خوړو نړیوال پروګرام هم په دغه هیواد کې د بشري بهران د زیاتېدو په اړه اندېښنه ښودلې وه او په دې برخه کې یې له نړیوالو مرسته کوونکو سازمانونو د مالي مرستې غوښتنه کړې وه.
د اقتصادي چارو شنونکي وایې پر افغانستان د امریکا د مرستو بندېدل، د کډوالو راستنېدل او د بې روزګارۍ اوج هغه لاملونه دي چې له کبله یې د دغه هیواد وګړي له بشري بهران سره مخ کړي دي.
